Wilujeng angkat ... Eulis !

Catetan demi catetan...

natrat ngalangkangan dina eunteung panglamunan

diguar ku harewos dangding nu dumareuda mapay-mapay lahunan peuting,

gerentes dina hariring, guntreng magunemkeun carita kamari

nu teu kungsi kasungsi

Eulis ......

Tresna nu kungsi jadi kacapangan

kiwari tinggal sesana nyalangkrung dina hiji rumpaka

kaheman gumawang tinggal tapakna ... anjeun geus ilang miang ka kalanggengan

mulang nepungan pasini nu pasti .... alam padang poe panjang

Eulis ....

sahenteuna ..... diri geus wakca handapeun purnama

tangkal tresna ngarandaka, galeuhna mageuhan catang kadeudeuh

sanajan teu kasiram cai kaheman, bakal tetep tumuwuh linduh

kembangna tetep marakbak  mapaés taman  asih dina sanubari

Peuting nu simpé, Eulis...

Hariring ngalengis ngoétan panineungan

Manjangna kahéman teu keudeu najan ku lumajuna waktu

Tresna kamari tetep sumanding dina kalongkéwang

Peuting nu simpé, Eulis ....

Taya nu kedal, ukur cipanon nyalangkrung mapagkeun ronghéapna hiji kalangkang...

Kalangkang  ngangres dina rangkulan kahoncéwang

Eulis...

Ti dieu ngamalir du’a  keur anjeun di kalanggengan

Muga anjeun ginulur rahayu mendak kabagjaan tepung jeung pangrungrum Yang Agung

Eulis ... hampura

Diri teu bisa nganteur ka pangreureuhan anjeun

Diri teu bisa nemonan basa anjeun mulang ka alam panjang

Ukur pangjajap nu kadalon ... wilujeng angkat panutan.

Pangancikan, 20 Pebruari 2011

Sajak

GUPAY KALAKAY

lengkah ki mangsa teu bisa dipungpang nigas carita nu tinggal catetan

gilirna wanci sumilir nyapih diri nu ngalengis nuguran kaketir ati

waktu nu mangprung mangpengkeun kalbu ka sagara kabingung

di dieu ukur kapaur mapaes karempan dina gawir

kainggis

basa Mei  jadi saksi pangjajap gupay ka nu miang

miang ninggalkeun tapak-tapak kamelang

cunduk waktu nu jadi kapaur

datang mangsa nu jadi kahoncewang

niti wanci nu jadi kaketir yen takdir teu beunang dipungkir kadar teu beunang disinglar

Aya datang aya mulang, mulang jeung datang geus pasti kateang

ngalangkangan katineung diri

basa urang balagonjakan naratas bulan jeung taun

natar pangharepan geusan numuwuhkeun bibit silihwangi

sangkan abdi abdi digjaya ngaranggem sagala cita-cita

bapa.....ibu

ukur gerentes nu tiasa kedal

panggupay kanu angkat

ukur ucapan nuhun....nuhun

kana sagala jasa salira

bapa.... ibu,

hapunten diri, hapunten abdi sadaya

nu nyesek ku kalepatan leber ku kasalahan

rumaos seueur ngabarungsinang nyieun karungsiing

bapa....ibu

ukur citangis nu jadi pangjajap

wilujeng angkat, wilujeng kantun

sapu nyere pegat simpay

mugi salira sinugrah bagja salalamina

angsal damel sadaya nu dicita-cita

wilujeng kantun ...bapa, ibu